قصة الأرملة السوداء كامله بكل اجزاءها

رنيم: خدلك بقى ! لك شو شافني فاتحة مافيا ! انت بشركة محترمة 

يامن: لكن شو المطلوب ؟

تدخلت رؤى: المطلوب انك تتزوج السيدة رنيم زواج ورقي لان عندها ظروف بتجبرها على هاد الشي 

قعد وسكر زر بدلتو وهو عم يضحك: ههههههه لك فكرت بدكن اخترق شي بنك او العب بالاسهم او اضرب امان شي شركة منافسه
خوفتوني يا جماعه.. طلعتو جايبني لتخففو دم 

تطلعت رنيم ورؤى ببعض باستغراب..

يامن: ههههههه بس لا لا والله مهضومين..بضميري انو مهضومين يا صبايا هههه مو معقول.. ههه هه ه

تطلع فيهن وبلشت تختفي ضحكتو.. سأل بطريقة جديه: لحظة.. انتو عم تحكو جد ؟ 

رفعت رنيم اكتافها بمعنى ما بعرف.. وفتلت ضهرها للجهة التانيه..

رؤى: اي سيد يامن.. عم نحكي جد وكتير كمان..

طلع يامن من المكتب وواضح عليه الانزعاج.. كان وشو احمر كتير وملامحو بتدل على العصبية..

سكتو الكل وتركوه بدون ما يسألوه شي تاني.. 

كانت رنيم قاعده ورا المكتب وحاسه بانزعاج كبير: شو بدنا نعمل هلأ ؟ معقول يحكي لرفقفاتو؟

رؤى: لا ما بيحكي..

رنيم: طيب والحل ؟ 

رؤى: هدي اعصابك بسيطة

رنيم: لك اساسًا انا مجنونة كيف توقعتو يوافق ! واضح انو شخص مغرور كتير وهلأ قدمتلو فرصه على طبق من فضة ليهين كرامتي 

رؤى: يا رنيم خلص اهدي خليني اعرف فكر..

رنيم: بشو بدك تفكري ؟ لازم نلاقي بديل باسرع وقت انا وعدت خالي 

رؤى: لا لا.. ما رح ندور على بديل.. بدنا هاد الشب بالتحديد 

رنيم: ليش ؟

رؤى: حسب نظرتي ف هو مناسب جدًا للخطة.. بس بدنا نعرف كيف نقنعو بعدين انتي مفكرة الشغلة شوربة ؟ ما فينا نجيب اي واحد من الشارع ونعملو زوجك.. بدك حدا يقتنع فيه خالك وما تخجلي فيه قدام الناس. ما تنسي انتي مين وشو مكانتك ! 
انتي ما انتبهتي انو رفض بكل ادب وقال بعتذر منكن ما فيني اخدمكن
هاد الشب عاطفي نوعًا ما.. بدنا نلعب على العاطفة عندو اكتر 

رنيم: كيف يعني ؟