روايه أغنى فقيره _ سميه خالد
=صحيح إنتي بتشتغلي إيه
-في مصنع أدويه بغلف كراتين بشيل الزيادات اللي بتقع من المكن
=عاملة يعني بس إنتي مبتتكسفيش ؟
-هو انا بشتغل شغل حرام ادام الشغل حلال مفيش حاجه تخليني أتكسف
*اللي نازل مطرية مطرية
-يلا وصلنا يا ندي
فريدة كانت ماسكة في إيدي كإني مسؤلة منها كإنها ماما ، انا أول مرة أحس إني مسئولة من حد أول مرة أكتشف قد ايه هي جميله أوي وانا اللي كنت عامية مشوفتش كل ده
طلعت النظارة الشمس من شنطتي ولبستها
علي الرغم من إني مكنتش لابسه حاجه مُلفته او ميك اب بس محدش نزل عينه من عليا
=فريدة هو ايه البتاع اللي طالع من الأغاني ده عامل زي العربية الصغنونة كدة
-ده توك توك
=تكتوك ؟
-لا لا ...توك ..توك
=طب بليز ممكن نبقي نركبه في مرة تخرجيني بيه شكله لطيف خالص ؟
صبرني يارب
وصلنا بيت فريدة
كانت عمارة صغيرة هادية جدا مفيهاش حِس
لقيت كرة بتخبط دماغي
لفيت ضهري ، لقيت عيل صغير أسمراني ضحكته جميله أوي
_أسف يا أبله مكنتش أقصد والله
-تعالي ي ندي أدخلي
ماما دي ندي صاحبتي اللي حكتلك عليها
قامت من علي الكرسي سلمت عليا وحضنتني بحُب
=أنا اسفة لو هتقل عليكي ياطنط بس أول لما يكون معايا فلوس هشوف شقة إيجار أقعد فيها
مامتها كانت وشها بشوش والإبتسامة مش مفارقة وشها.. بيضه وعنيها بنُي
عرفت إبتسامة الرضا اللي دايما علي وش فريدة دي جيباها منين
البيت عبارة أوضين وصالة ومطبخ يادوب يساع فرد واحد
الأوضة علي الرغم من صغرها كانت جميله ومرتبه وصور ربانزل وملكة الجليد كانت ماليه الحيطه
=طيب أنا ممعيش هدوم و...
-دولابي عندك خدي اللي إنتِ عوزاه
=طب بليز ممكن تفتحي التكيف الجو نا-ر خالص
- معندناش تكيف وبعدين ما المروحه شغالة أهي اكراما ليكي هخلي المروحة عندك النهاردة بعدين هحطها نحيتي عشان مابتلفش غير علي إتجاه واحد
نمت من التعب مقدرتش أقعد لبليل
حسيت ب أيد بطبطب علي كتفي براحة
-ندي ..قومي عشان تاكلي
=يوووه حطيلي الأكل في الجنينة هفطر هناك ي ريهام
-انا فريدة ي ندي
